如果施政報告令你滿意 恭喜!香港好啱你住

Credit: Reuters / Bobby Yip
我們想讓你知道的是

「如果呢份咁嘅施政報告你好滿意,咁我祝福你早日置業,香港真係好啱你住。」

香港人,真係好易呃。

睇下林鄭今日去立法會答問大會,個副傲慢志得意滿嘅咀臉,睇埋港大民調,施政報告不滿意率只得14%,滿意率近一半,就知香港人有幾易呃。

人大831、87粒催淚彈、DQ 6、百幾個抗爭犯、全民退保標準工時走數,算,唔翻舊帳,一單還一單,淨係睇份施政報告,都係一舊屎。

交通補貼,300蚊唔夠林鄭俾乞兒,算,要坐1600蚊車隨時益水貨客,算,你無理由睇唔出,用「公帑」補貼你搭車,係幾咁反智掛?

公帑主要係邊度黎?一係我地交稅,即係我啲錢,二係政府賣地,點解香港啲地咁貴,因為香港人集體做樓奴,賣地收益,都係我地啲錢。再諗真啲,香港搭車點解咁貴,因為港鐵年年賺錢都照加價,因為有加無減機制,因為政府作為大股東從來無要求港鐵減價,無打算回購。

結論係,個政府搞到搭車好X貴,再用我交稅供樓啲錢補貼我搭車,一個月3嚿水,我係咪要多謝你?

另一大嚿房屋企策,綠置居呀、首置上車盤呀、置業優先呀,買到樓呀好開心呀,其實都係一大嚿屎。

綠置居第一批4800個單位,咪有4800個公屋戶買到樓囉,yeah開心跳起,對唔住,嗰4800個單位原本係要嚟做公屋,而家拎左嚟賣,呢4800戶空出嚟嘅舊單位,就做返公屋,搞完一輪,除咗有批人,由租戶變業主之外,係「一個單位都無多到」,重覆,係一個單位都無多到。

而家有27萬戶等緊公屋,唔計單人,要等差唔多5年先上到樓,林鄭嘅政策係,拎啲公屋去賣,再叫啲等上樓嘅人,住「貨櫃屋」、「光房」、「中轉屋」,無得頂。

首置上車盤,又係用糖紙包住一舊屎。

第一批千幾個單位,塊地又從何來?又係政府地,本身可以拎去賣做私樓或者起公屋、居屋,即係搞完一大餐,多咗幾多單位供應?答案係零。

成嚿嘢只係令一班本身買唔到居屋、又買唔起私樓嘅人,有個抽獎嘅機會,對成個房屋供應完全無幫助,如果你話唔緊要,我就係想要抽獎,政府俾獎我抽我就好開心好滿足,咁,等你抽到先講。

結論係,香港基層住屋水深火熱,林鄭就全力叫班「中產」去買樓,整體供應完全無增加,佢今日認埋,46萬建屋目標做唔到,話「無魔術棒」解決土地問題。

喂阿姐,你前任梁振英講咗5年,土地供應係施政重中之重,重咗5年,地呢?你作為CS咪話唔關你事。再上一屆你阿姐係發展局長,主管土地發展,地又去咗邊呢?而家到你坐正,你話你變唔到地出嚟?咁對上個5年10年,重中之重嘅土地政策,係咪食咗屎?粉嶺高爾夫球場塊地呢?你好打得個陣話要搞嘅丁權問題呢?放心,無人記得。

所以話,如果呢份咁嘅施政報告你好滿意,咁我祝福你早日置業,香港真係好啱你住,I love Hong Kong,這是我家~~

本文獲授權轉載,原文見作者Facebook

責任編輯:周雪君

核稿編輯:王陽翎

或許你會想看
更多『評論』文章 更多『政治』文章 更多『林彥邦』文章
Loader