想發起「政治性罷工」要考慮什麼問題?

想發起「政治性罷工」要考慮什麼問題?
我們想讓你知道的是

罷工罷唔罷得成,係睇大家打工仔女,要時間去醖釀。工會就算號召罷工,實際冇人響應,都係空談。103萬人大遊行,都冇可能一日爆出嚟。

文︰麥德正

關於罷工、罷市,同大家一齊認真諗下。

「政治性罷工」及「罷市」對政權嘅壓力就係,令社會運作及經濟運作受影響,逼政權接受民眾政治訴求。「政治性罷工」例子:八十年代,韓國多次大罷工、波蘭團結工會大罷工。

一般「罷工」,大家所見,係「經濟性罷工」,例如海麗清潔工罷工,係僱主不合理剝削,令工人忍無可忍,於是以罷工手段抗爭。罷工對僱主有殺傷力,就係斷佢生意盈利,逼佢接受工人要求。

工人方面,想搞罷工,先要計算清楚成本及風險,包括會否被炒,罷工冇糧出,手停口停。如有工人想罷工,有工人唔想罷工,雙方是否可以達成共識?

就算話「政治性罷工」,唔係針對老闆,但一樣影響生意。你唔妥林鄭,我都係,但你搞死我盤生意,首先與我為敵喎。

有老闆抵得諗,認為值得賺少啲,一齊向政權施壓,搞罷市,係好事。工人反正都冇工開了,聲稱罷工都可以,但係要搞清楚,罷市期間,工人份糧點計?有工人因罷市被逼停工冇糧出,會唔會追討?

法律對於員工「政治性罷工」及「罷市」嘅保障,係零。

所以,想全社會「政治性罷工」及「罷市」,需要一段時間去討論、醖釀。而家有僱主表示6月12日罷市,亦有市民提出罷工,但仲有兩日就係6月12日,醖釀時間一定唔夠。咁倉猝嘅罷工、罷市行動,亦一定係政治表態,多於實質有力量令政權跪低。但係,作為醖釀更大規模「政治性罷工」及「罷市」嘅第一步,係值得做的。

另一具體問題係,「政治性罷工」,係乜行業罷工最有力?

舉一個例:2007年,紮鐵罷工36日,全香港起唔到樓,直接影響地產金融,於是國家主席胡錦濤問曾蔭權,紮鐵罷工搞成點?

有人提出,如果公共運輸罷工就好囉,好多人返工返唔到,就可以乘機罷工罷市囉。咁,公共運輸又好,乜行業都好,罷工如何發生?

工會發動合法罷工,要有程序,要經工會理事會或會員大會通過,6月12日一定趕唔切,而亦都一定要有工會會員或理事,跟據工會規章,去召開會議。有關程序詳情,在此唔多講了。

可能大家會諗,九巴葉葉蔚琳車長號召罷工,可以不經工會程序,所有打工仔女皆可效法?呢啲叫「野貓式罷工」,唔受法例保障,而更重要係,吹雞要吹得起,勞方一定要夠實力持續團體,唔係一搞完就散水,否則老闆唔妥你,秋後一定算你帳。

罷工罷唔罷得成,係睇大家打工仔女,要時間去醖釀。工會就算號召罷工,實際冇人響應,都係空談。103萬人大遊行,都冇可能一日爆出嚟。

罷工之外,仲有其他款式嘅工業行動,例如:按章工作、集體請假、在工作程序中「玩嘢」之類。但萬變不離其宗,工人之間有討論,有共識,集體行動,持續團結,先至係真正有力量。

我全職從事工運期間,做過罷工核心工作,包括紮鐵罷工36日、碼頭罷工40日。亦做過類近罷工的工業行動核心工作,包括新巴、城巴慢駛工業行動,至於建築地盤及廠房追糧式罷工,更無以數計。

我亦曾經係連續十年民陣七一大遊行總負責人/糾察長。

長年以來,我夢想將以上兩種經歷夾埋,成為「全民政治性罷工」,如果真係發生,都會罷市啦。

本文獲授權轉載,原文見作者Facebook專頁

相關文章︰

責任編輯︰鄭家榆
核稿編輯︰歐嘉俊

或許你會想看
更多『評論』文章 更多『政治』文章 更多『精選轉載』文章
Loader